Դեսպան Ա.Մարտիրոսյանի աշխատանքային այցը Չեննայ

05 փետրվարի, 2017

Ս.թ. փետրվարի 3-ին Հնդկաստանում ՀՀ դեսպան Արմեն Մարտիրոսյանը Չեննայ կատարած աշխատանքային այցի շրջանակներում հանդիպում է ունեցել Չեննայի «Աննա» համալսարանի ղեկավարության և գիտական խորհրդի անդամաների հետ, որի ընթացքում քննարկվել են տվյալ համալսարանի և Հայաստանի Ազգային պոլիտեխնիկական համալսարանի միջև համագործակցության հաստատման հնարավորությունները։

Քննարկմանը Ա.Մարտիրոսյանը ներկայացրել է հայկական առաջատար ճարտարագիտական բուհի ուսումնագիտական ներուժը և պատասխանել ներկաների հարցերին։ Հյուրընկալող կողմն իր հերթին ՀՀ դեսպանին ծանոթացրել է «Աննա» համալսարանի գործունեությանը՝ նշելով, որ համալսարանների գլոբալ վարկանիշային ցանկում այն զբաղեցրել է 293-րդ տեղը և ունենալով մոտ 600 հազար ուսանող՝ համարվում է աշխարհի խոշորագույն բուհերից մեկը։ Քննարկման արդյունքում որոշվել է կազմակերպել երկու համալսարանների ներկայացուցիչների փոխադարձ ճանաչողական այցեր, որոնց արդյունքում կորոշվի տվյալ բուհերի միջև համագործակցության առավել հեռանկարային ուղղությունները։

Այցի շրջանակներում դեսպան Ա.Մարտիրոսյանը ս.թ. փետրվարի 4-ին մասնակցել է նաև 1712թ. կառուցված Սուրբ Մարիամ հայկական եկեղեցում կազմակերպված պատարագին, որին ներկա էին Հնդկաստանի Թամիլ Նադու և մոտակա այլ նահանգներում բնակվող հայեր և այլազգի քրիստոնյաներ։ Պատարագից հետո Ա.Մարտիրոսյանը հանդիպել է հնդկահայ համայնքի ներկայացուցիչների հետ և քննարել հայկական այս պատմամշակութային կոթողի պահպանման հետ կապված խնդիրները։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր