ՀՀ դեսպան Արմեն Մարտիրոսյանը հադիպել է Բանգլադեշի մշակույթի նախարար Կ.Մ.Խալիդի հետ

12 փետրվարի, 2019

Փետրվարի 12-ին կայացել է Բանգլադեշի Ժողովրդական Հանրապետությունում ՀՀ արտակարգ և լիազոր դեսպան Արմեն Մարտիրոսյանի հանդիպումը Բանգլադեշի մշակույթի նորանշանակ նախարար Կ.Մ.Խալիդի հետ։

Նախ և առաջ վերջինիս դեսպան Մարտիրոսյանը շնորհավորել է նախարարի պաշտոնում նշանակվելու կապակցությամբ։ Այնուհետև դեսպան Մարտիրոսյանը տեղեկացրել է, որ Բանգլադեշի արտաքին գործերի նախարար Ա.Կ.Աբդուլ Մոմենի հետ տեղի ունեցած քննարկման արդյունքում երկկողմ մշակութային համագործակցությանը տրվել է առանձնահատուկ նշանակություն։

Դեսպան Մարտիրոսյանը երախտագիտություն է հայտնել Բանգլադեշի մշակույթի նախարարության ղեկավարությանը Դաքքայի Սուրբ Հարություն հայկական եկեղեցու լուսանկարը իրենց հնագիտության դեպարտամենտի կողմից հրատարակված 2019թ. օրացույցում ներառելու համար։

Քննարկումների արդյունքում նախարար Խալիդն իր կառավարության անունից պատրաստակամությունն է հայտնել քայլեր ձեռնարկել՝ ներառելու Դաքքայի Սուրբ Հարություն եկեղեցին ՅՈՒՆԵՍԿՕ-ի համաշխարհային ժառանգության օբյեկտների ցանկում։ Կողմերը պայամանավորվածություն են կայացրել համատեղ ջանքերով կյանքի կոչել այդ գաղափարը։ Միաժամանակ նախարար Խալիդը խոստացել է քաղաքային ծառայությունների հետ միասին միջոցներ ձեռնարկել՝ ուղղված եկեղեցուն հարող փողոցների բարեկարգմանը, ինչը կնպաստի նաև եկեղեցի այցելող զբոսաշրջիկների թվի աճին։

Պայմանավորվածություն է ձեռք բերվել նաև հայ փորձագետների օգնությամբ վերականգնելու Բանգլադեշի ազգային թանգարանի որոշ յուղանկարներ, ինչպես նաև այդ թանգարանում ներկայացնելու Բենգալի հայ համայնքի պատմությունն ու հայկական կերպարվեստի որոշ նմուշներ։ Նախատեսվում է ընթացիկ տարվա վերջին Դաքքայում կազմակերպել հայկական դասական երաժշտության համերգներ։

Վերոնշյալ ծրագրերի իրականացմանն իր կարևորագույն մասնակցությունն է բերում Դաքքայի Սուրբ Հարություն եկեղեցու նախագահ ամերիկահայ Արմեն Արսլանյանը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր