Հայաստանի օր «Լանսերս» միջազգային դպրոցում

26 ապրիլի, 2019

Ապրիլի 26-ին Հնդկաստանի Հարյանա նահանգի Գուրուգրամ քաղաքի «Լանսերս» միջազգային դպրոցը «Համայնքային նախագիծ» ամենամյա ծրագիրի շրջանակներում այս տարի «Հայ-հնդկական բարեկամություն» կազմակերպության հետ համատեղ կազմակերպել էր միջոցառում՝ նվիրված Հայաստանին:

Միջոցառմանը դպրոցի աշակերտները համառոտ ներկայացրին հայ ժողովրդի պատմության, մշակույթի և գրականության նկարագիրը, ինչպես նաև՝ Հնդկաստանում հայ համայնքի պատմական դերակատարությունը։

Միջոցառմանը մասնակցում էին և ողջույնի խոսքով հանդես եկան Հնդկաստանում ՀՀ արտակարգ և լիազոր դեսպան Արմեն Մարտիրոսյանը և Հայաստանում Հնդկաստանի նախկին դեսպան Աչալ Մալհոտրան։

Պարոն Մալհոտրան ջերմությամբ հիշեց Հայաստանում անցկացրած տարիները՝ հորդորելով աշակերտներին շարունակել Հայաստանի մասին ուսումնասիրությունները։ Այդ նպատակով նա դպրոցին նվիրեց իր հեղինակությամբ վերջերս լույս ընծայված «Հնդկաստան-Հայաստան. այնքան հեռու դեռ, ինչքան մոտ» գիրքը, որը նվիրված է երկու երկրների և ժողովուրդների պատմամշակութային կապերին:

Ելույթ ունեցավ նաև «Հայ-հնդկական բարեկամություն» կազմակերպության փոխնախագահ Ռուզաննա Աշուղյանը։ Վերջինս ներկայացրեց իրենց կազմակերպության գործունեությունը և շնորհակալություն հայտնեց դպրոցին միջոցառումը հյուրընկալելու համար։

Միջոցառման ավարտից հետո դպրոցի ղեկավարության հետ ունեցած քննարկմանը դեսպան Մարտիրոսյանն առաջարկեց համագործակցություն հաստատել հայկական դպրոցների հետ, կազմակերպել ճանաչողական այցեր և իրականացնել գիտելիքների ու փորձի փոխանակում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր