Դեսպան Արմեն Մարտիրոսյանն իր հավատարմագրերը հանձնեց Բանգլադեշի Նախագահ Մոհամմադ Աբդուլ Համիդին

06 հուլիսի, 2017

Ս.թ. հուլիսի 6-ին Բանգլադեշում ՀՀ արտակարգ և լիազոր դեսպան Արմեն Մարտիրոսյանն իր հավատարմագրերն է հանձնել Բանգլադեշի Ժողովրդական Հանրապետության նախագահ Մոհամմադ Աբդուլ Համիդին։

Արարողությանը հաջորդած առանձնազրույցի ընթացքում Բանգլեդեշի նախագահը նշել է, որ թեև այս տարի լրանում է Հայաստանի և Բանգլադեշի միջև դիվանագիտական հարաբերությունների հաստատման 25-ամյակը, սակայն երկու ժողովուրդների պատմական առնչություններն ունեն ավելի քան չորս հարյուր տարվա պատմություն։ Նախագահ Աբդուլ Համիդն ընդգծել է հայերի ունեցած առանձնահատուկ մշակութային ավանդը Բենգալում՝ բերելով մի քանի ուշագրավ պատմական փաստ։ Նա մասնավորապես նշել է, որ Բենգալի առաջին դպորցը, որը որպես կրթօջախ գործում է մինչ օրս, հիմնել են հայերը, Դաքքայում գործում է հայկական եկեղեցի (Սուրբ Հարություն հայ առաքելական եկեղեցին՝ հիմնված 1781 թվականին), քաղաքի կենտրոնական մասում են գտնվում «Հայկական թաղամասը» (Armeniatola) և «Հայկական փողոցը», իսկ տարածքը, որում այժմ գտնվում է նախագահական նստավայրը, մոտ երկու դար առաջ պատկանել է Մանուկ անունով հայ վաճառականի։

Նախագահ Մ.Աբդուլ Համիդը դեսպան Արմեն Մարտիրոսյանին խնդրել է իր ջերմ ողջույնները և բարեմաղթանքները փոխանցել ՀՀ Նախագահ Սերժ Սարգսյանին։ Շնորհակալություն հայտնելով ցուցաբերված բարձր ընդունելության և բարեմաղթանքների համար՝ դեսպան Արմեն Մարտիրոսյանը նշել է, որ երկու ժողովուրդների միջև ձևավորված պատմական կապերը թույլ են տալիս նոր լիցք հաղորդել երկկողմ հարաբերությունների հետագա առաջխաղացմանը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր