Համագործակցությունը Հնդկաստանում ՀՀ դեսպանության և Կալինգայի սոցիալական գիտությունների ինստիտուտի միջև զարգանում է

06 օգոստոսի, 2017

Ինչպես հայտնի է, 2017թ. փետրվարին Հնդկաստանում ՀՀ դեսպան Արմեն Մարտիրոսյանը այցելել էր Հնդկաստանի՝ ցեղային համայնքների երեխաների համար նախատեսված խոշորագույն դպրոց-պանսիոն` Կալինգայի սոցիալական գիտությունների ինստիտուտ (ԿՍԳԻ), դրա հիմնադիր պ-ն Աչյուտա Սամանտայի հրավերով։ Այցի ընթացքում նրանք քննարկել էին համագործակցության հնարավոր ուղիները։

Պ-ն Սամանտան «Ավրորա» մարդասիրական նախաձեռնության հրավերով ս.թ. մայիսին այցելեց Հայաստան՝ մասնակցելու «Ավրորա մրցանակ հանուն մարդասիրաց» միջազգային համաժողովին և մրցանակաբաշխությանը։ Որպես «Ավրորա-2017» երկխոսության մասնակից պ-ն Սամանտան Հայաստանի ամերիկյան համալսարանում հանդես եկավ դասախոսությամբ՝ «Բռնության կասեցմամբ մարդասիրության և խաղաղության տարածումը» թեմայով։ Նա ներկայացրեց իր անձնական փորձը և տեսլականը, թե ինչպես կրթությունը կարող է օգնել տարբեր մարդասիրական խնդիրների կարգավորմանը։

Ս.թ. օգոստոսի 1-ից 5-ը Հնդկաստանում ՀՀ դեսպանությունը ԿՍԳԻ հետ համատեղ մշակութային փոխանակման շրջանակներում կազմակերպել է Նյու Դելիի հայ համայնքի ներկայացուցիչ Աննա Ավագյանի և նրա ամուսնու՝ Ռահուլ Սեթիի այցը ԿՍԳԻ։ Հայկական ավանդական պարի մասնագետ և երաժշիտ Աննա Ավագյանը ԿՍԳԻ աշկերտներին տրամադրեց դասեր։ Նա նաև նվագեց սանթուր, իսկ աշակերտները կատարեցին հայկական Ուզունդարա պարը:

Իր հերթին պ-ն Ռահուլ Սեթհին, ով Երևանի պետական բժշկական համալսարանի շրջանավարտ է, դպրոցի սաների համար իրականացրեց սրտանոթային համակարգի առողջության պահպանման և անձնական հիգիենայի թեմայով բազային ուսուցում։

Այցի ավարտին հյուրերին շնորհվեց շնորհակալագրեր ԿՍԳԻ միջազգային կամավոր ստաժավորման ծրագրին մասնակցելու համար։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր