Նյու Դելիում նշվեց Մեծ Եղեռնի 105-րդ տարելիցը:

24 ապրիլի, 2020

Ապրիլի 24-ին Հայոց ցեղասպանության 105-րդ տարելիցի կապակցությամբ տեղի ունեցավ համաժողով, որը կրում էր «Փոխգործակցություն Հայոց ցեղասպանության շուրջ. Պատմություն և հեռանկար» խորագիրը: Համաժողովը կազմակերպել էին Հնդկաստանում ՀՀ դեսպանությունը և Նյու Դելիի «Վիվեկանանդա միջազգային հիմնադրամ» առաջատար հետազոտական կենտրոնը՝ համատեղ: Հաշվի առնելով COVID-19 համավարակի հետևանքով ստեղծված իրավիճակը՝ համաժողովն ընթացավ տեսակոնֆերանսի ձևաչափով։

Համաժողովը բացեց «Վիվեկանանդա» հիմնադրամի տնօրեն Արվինդ Գուպտան: Այնուհետև ելույթ ունեցավ Հնդկաստանում ՀՀ դեսպան Արմեն Մարտիրոսյանը: Քննարկմանը մասնակցեցին և ելույթներով հանդես եկան Դելիի առաջատար Ջ.Նեհրուի անվան համալսարանի պրոֆեսոր Աշվինի Մոհապատրան և հինդի լեզվով Հայոց ցեղասպանությանը նվիրված առաջին գրքի խմբագիր, հայտնի գրող և հրապարակախոս դոկտոր Սուման Քեշարին։ Համաժողովին Հայաստանից մասնակցեց նաև ԵՊՀ դասախոս, ցեղասպանագետ, դոկտոր Սուրեն Մանուկյանը: Վերջինս տեսակոնֆերանսի մասնակիցներին հակիրճ ներկայացրեց Հայոց ցեղասպանության պատմությունը և դրա միջազգային ճանաչման ու հետևանքների վերամցման առկա հիմնախնդիրները:

Տեսակոնֆերանսի մասնակիցները հնարավորություն ունեցան Հայոց ցեղասպանության և հայ-թուրքական հարաբերությունների վերաբերյալ իրենց հետաքրքրող հարցերն ուղղել համաժողովի հայ զեկուցողներին։

Հայոց ցեղասպանության 105-րդ տարելիցի շրջանակներում դեսպան Արմեն Մարտիրոսյանը հարցազրույցներ է տվել նաև հնդկական «StratNews Global» և «Rajya Sabha TV» հեռուստաալիքներին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր